Улаанбаатар
“Жибли” студи Каннын кино наадмын хүндэт шагналыг хүртэнэ
ДЭЛХИЙН МЭДЭЭ | СОЁЛ УРЛАГ
ТОКИО, 2024 оны дөрөвдүгээр сарын 18 /NHK/. Японы “Жибли” анимейшн студи Каннын кино наадмын хүндэт шагнал болох “Алтан дал мод” шагналыг хүртэхээр болжээ. Тус студи “Оскар”-ын шагналт "Spirited Away", “The Boy and the Heron” бүтээлүүдээрээ олонд танигдсан билээ.
Дэлхийн хамгийн
том гурван кино наадмын нэг болох Каннын кино наадмыг зохион байгуулагчид дээрх
мэдэгдлийг лхагва гарагт хийжээ. Кино урлагт оруулсан хувь нэмрийг нь үнэлэн ихэвчлэн
найруулагч, жүжигчид зэрэг хувь хүмүүст гардуулдаг “Алтан дал мод” шагналыг
түүхэнд анх удаа хамт олонд олгох гэж байгаа нь энэ юм.
Анимэ киноны найруулагч
Мияазаки Хаяо, Такахат Исао нарын үүсгэн байгуулсан “Жибли” студийн ололт амжилтыг наадмыг зохион байгуулагчид өндрөөр үнэлээд, сүүлийн 40 жилийн хугацаанд анимейшн кинонд шинэ салхи оруулсныг онцоллоо.
Энэхүү нэр хүндтэй шагналыг гардан авах гэж байгаадаа
туйлын их баяртай байгаагаа “Жибли” студийн продюсер Сүзүки Тошио илэрхийлжээ. Тэрбээр
хэлэхдээ, хэдийгээр Миязаки бид хоёр нас ахиж байгаа ч гэсэн компанийн мөн чанарыг
тээн авч явах ажилтнуудаар ахлуулсан студи маань шинэ сорилтуудыг даван туулна
гэдэгт итгэлтэй байна гэлээ.
Тус студийн 2023
оны бүтээл “The Boy and the Heron” нь энэ оны гуравдугаар сард болсон “Оскар”-ын наадмаас “Шилдэг анимейшн” шагналыг
хүртсэн юм. Энэ нь Миязакигийн хувьд хоёр дахь “Оскар” байв.
Каннын кино наадмын 77 дахь удаагийн шагнал гардуулах ёслол ирэх тавдугаар сарын 14-25-ны өдрүүдэд болно.
